ආණ්ඩුව යන මග?

ආණ්ඩුව යන මඟ ගැන විවිධ කතා ලියන්න පුලුවන් ය. කෙසේ වෙතත් ජන්දදායකයා බලාපොරොත්තු වූ දේවල් වෙනවාද යන්න ගැටළු සහගතය. මේ ඒ ගැන මාධවගේ අදහස ය.

විපක්ෂය අසන ප්‍රශ්න ගැන

විපක්ෂයේ ප්‍රශ්න ඉදිරිපත් වීම සහ කඩිනම් ලෙස ඒවාට පාර්ලිමේන්තුවේදීම උත්තර බැඳීම සම්බන්ධව ආණ්ඩුවේ ප්‍රධාන සංවිධායක උන්නැහේට ස්තූති වන්ත විය යුතුය. බිමල් සිය කටයුත්ත හොඳින් කරනු පෙනේ. මීට පෙර සිටි ගොරවා බුරා වැටෙන උන්ට සහ ඇඟ බේරාගන්නා උන්ට වඩා යහපත් ප්‍රවණතාවයක් ලෙස මාධව එ තත්වය දකින්නේය.

කෙසේ වෙතත් පණ නැති විපක්ෂයක් ඇති නිසා ආණ්ඩුවට බැට් කිරීම පහසු වී ඇති බවත් නිරීක්ෂණය වේ. විවිධ පුද්ගලයින් විවිධ චෝදනා නගන විට පිළිතූරු දීම නිසි පරිදි සිදු කරත් එය ආණ්ඩුකරණයට ප්‍රමාණයත් උනත් රට තුල ඇති වනුයේ වෙන අදහසක් බව මාධවගේ සිතුවිල්ලයි.

 

පුවත්පත් සහ මාධ්‍ය ගැන චෝදනා

පසුගිය දිනෙක ජනමාධය අමාත්‍යවරයා අරුණ පුවත්පතට සහ හිරු නාලිකාවට චෝදනා කලේ අසත්‍ය වපුරන බව කියා පාමිනි. කෙසේ වෙතත් ඒසේ ප්‍රසිද්ධියේ චෝදනාව වක්‍රාකාරයෙන් සමහරුන් වර නගන්නේ මාධ්‍ය මර්ධනයක ස්වරූපයක සෙවනැලි මතුවන බව පවසමිනි. කෙසේ වෙතත් මාධ්‍ය ද සිය වගකීම සිදු කිරීම නිසි පරිදි සිදු කිරීමත් මාධ්‍ය සමඟ අනවශ්‍ය ගැටුමකට නොයෑමත් ආණ්ඩුවට හිතකර වනු ඇත. අතීතයේ ආණ්ඩුකරණයන් වලින් පාඩම් අවශ්‍ය නම් ඉගෙන ගත හැකිය.

 

වේදිකාවල කියූ කතා සහ දැන් කියන කතාන්දර වල පරස්පරය

මාධව ද ආණ්ඩුව පත් කිරීම වෙනුවෙන් සිය ජන්දය ලබා දුන් අයෙකි. මාධව ඇතුළු බොහෝ අයද ඒසේය.  මාධවට හමු වුනු ඇතැම් පිරිස් ජන්දය භාවිතා කර නොතිබුනේ පොහොට්ටුව, යූ ඇන් පීය හෝ සජබය පරාජය වන බව දන්නා නිසා මිස ජවිපෙට හෝ එන් පී පීයේ ජයග්‍රහණය ප්‍රාර්ථනාවෙන් නොවේය. බහුතරයක් රනිල් 2048 දී රට හදන කම් බලාගෙන ඉන්නත් හිත හදාන ඉන්න ආව උන්ය.

කෙසේ වෙතත් NPP වේදිකාවල ඇසුනු ඉන්ධන මිල, විදුලි බිල, සහ වැට් බදු ගැන කතා දැන් අමතකව ගොස් ඇති සෙයක් පෙනී යන්නේ කියන කරන ඒවා නිසාය. කෙසේ වෙතත් රනිල් ගිය මඟ යාම හොඳ යැයි මාධව ද විශ්වාස කරන්නේ වෙන මඟක් නැති නිසාය. වැල් පාලමේ ගමන් කරන රනිල්ගෙන් ලංකාව නැමති දරුවා උදුරාගෙන අනුරගේ අත තබන්නේ රනිල් ගැන විශ්වාස නොමැති නිසාම නොව අනුර ගැන විශ්වාසයක් ගොඩ නැගී තිබුනු නිසාය. දැන්.....

දැන් ඒ විශ්වාසය බිඳ වැටෙමින් තියනවාදෝ කියා මාධව ට නං සිතෙන්නේය.

මහා කළු ගල් වුවද කාලයාගේ ඇවෑමෙන් දිය වී යන්නේය. මහා පරුවතයක් සේ ගොඩ නැඟුනු රාජපක්ෂ රෙජිමය සහ කුජීත පොහොට්ටු ආණ්ඩු මහජන නැගිටීම් සහ ප්‍රජාතන්ත්‍රවාදය හමුවේ දියවී ගියේ කෙසේදැයි අනුර ඇතුළු ආණ්ඩුවට අමතක නොවිය යුතුය. ඒබැවින් වහාම සිදු කල යුතු දේවල් ලෙස මාධව දකින්නේ පහත දේවල් ය.

• ජන ජීවිතය ඉහල දැමීම සඳහා භාණ්ඩ හා සේවා පහසුවෙන් ලබා ගැනීමට හැකි පරිදි නියාමනයන් සහිත වෙළදපලක් සැකසීම.

• දූෂණය පිටු දැකීමට නව ක්‍රමවේද ගෙන ඒම, නීති සැකසීම සහ මහජන දේපල කොල්ල කෑ පුද්ගලයින්ට ඉක්මණීන් නඩු අසා දඩුවම් දෙන ක්‍රමයක් ඇති කිරීම. ඔවුන්ගේ දේපල සියල්ල රජයට පවරාගැනීමට කටයුතු කිරීම. එහිදී තරාතිරම නොබලා දඩුවම් පැමිණවීමෙන් දූෂණයට වැට බැඳීම.

• පසුගිය ආණ්ඩු වල සිදු වූ අපරාධ පිලිබඳව සොයා බැලීම සහ ඒවාට අවශ්‍ය නීති මාර්ගික කටයුතු සිදු කර අපරාධකරුවන් නීතියෙන් දඩුවම් පැමිණවීම. ඉදිරියේදී එවැනි දේවල් සිදු නොවීමට තත්වයක් ඇති කිරීම

• ඵලදායී සහ ශක්තිමත් රාජ්‍ය සේවයක් ඇති කිරීම සහ ඒ පිලිබඳව මහජනතාවගේ තෘප්තිමත් බව ඉහල නැංවීම.

• රජයේ දේපල අල්ලාගෙන ඉන්නා දේශපාලන තක්කඩීන් ඒවායින් පන්නා දමා එම ඉඩම් සහ දේපල ඵලදායී ආයෝජන බවට පත් කර ගැනීම.

• පොදු ප්‍රවාහනය ශක්තිමත් කිරීම සහ මහජනතාව එයට ආකර්ෂණය කර ගැනීම.

• අධිකරණ ක්‍රියාවලිය වේගවත් කිරීමෙන් වසර ගණනාවක් යුක්තිය අහිමි වී සිටින පුරවැසියන්ට සාධාරණය ඉටු  කිරීම.

• දිගුකාලීන ප්‍රතිපත්ති නිර්මාණය කිරීම මගින් ස්ථාවර භාවය ඇති කිරීම

• තව වසරක් ඇතුළත විධායක ජනාධිපති ධූරය අවසන් කිරීම.

 

මහජනතාව ආණ්ඩුව ප්‍රශ්න කිරීම තවමත් ආරම්භ වෙමින් පවතී. තවමත් ආණ්ඩුව වෙනුවෙන් විශ්වාසය තබා ඒ වෙනුවෙන් පෙනී ඉන්නා පිරිසක් සිටී. කෙසේ වෙතත් තව කණ්ඩායමක් බලය ඩැහැගැනීමට මාන බලමින් ඉන්නෝ බව ප්‍රකාශ වලින්ම පෙනී යයි. කෙසේ වෙතත් ප්‍රවේශමෙන් කිරා බලා වැඩ කිරීම ආණ්ඩුවේ හැකියාව විය යුතුය.

 

සහනාධාර මානසිකත්වය නැති කිරීම

ආණ්ඩුව අස්වැසුම වැඩි කල බව කියයි. කෙසේ වෙතත් අස්වැසුම අස්වැසුමක් උනේ කාටද යන්න රටම දන්නා කරුණකි. ඒබැවින් අස්වැසුම ලබා දීම කෙටි කාලයකින් අවසන් කර මහජනතාවගේ බදු මුදල් නිසි පරිදි ඵලදායීව රටේ සංවර්ධනයට සහ සුභසාධනයට යොදවා ගැනීම සිදු කල යුතුය.

ව්‍යවසායකත්වය අරමුණු කරගන්නා තැනකට අස්වැසුම ලාභීන් යොමු කර ඔවුන්ව සහනාධාර මානසිකත්වයෙන් මුදවා උපයන්නන් බවට පත් කිරීමේ ඉක්මණ් වැඩපිලිවෙලකට ආණ්ඩුව යා යුතුය.

 

මහජනතාවගේ වගකීම

රට නිසි මඟ යාමට නම් ආණ්ඩුවට පමණක් වෙනස් වීමෙන් නොහැකිය. මිනිස්සුන්ද වෙනස් විය යුතුය. ටොපි කොලය බිම නොදැමීමේ සිට රටේ විටින් විට පනවන නීතීන්ට යටත් වීමෙන් සහ නීතිගරුකව කටයුතු කිරීමෙන් මේවාට සහය විය යුතුය. පසුගිය බස් ත්‍රීවීල් වල කෑලි ගැලවීම (ඒය සම්පූර්ණයෙන්ම වැරදි තැනින් අල්ලාගත් ක්‍රියාවලියක් බව මාධවගේ නිරීක්ෂණයයි) අවස්ථාවේදී බස් හිමියන් මුලදී හැසිරුනු ආකාරය සැබැවින්ම පුරවැසියෙක් ලෙස අනුමත කල හැකිද?

ඇතැම් විට පනවන නීති මාලාවන් සහ වෙනත් දේවල් නිසා පුද්ගලිකව මාධවට ද අලාභයක් විය හැකිය. ඔබටද එසේ විය හැකිය. කෙසේ වෙතත් පොදු මහජන සුබ සෙත උදෙසා පනවන නීති සහ ආඥා වල‌ට අකමැති වුවුද අවනත වීම සිදු විය යුතුය. කෙසේ නමුත් පොදුවේ මහජනයාට හානිකර දේවල් වෙනුවෙන් නැගී සිටීමට ශක්තිවන්තව සිටිය යුතු බවද සිහියේ තබා ගත යුතුය!

 

ලිපියේ සාරංශය -

ආණ්ඩුව වසර පහක් පාර්ලිමේන්තුවේ බලය අතැතිව පහසුවෙන් දුවනු ඇත. රාජ්‍ය නිලධාරී වාදය සමඟ ඒ ගමනපහසු නොවනු ඇත. ඒවාද සැලකිල්ලට ගනිමින් සහ ආණ්ඩුවේ විනය පවත්වාගනිමින් මේ ගමන යා යූතුය. තවදුරටත් මහින්දලාගේ වැරදි රනිල්ලාගේ වැරදි කියමින් කාලය කෑමට මිනිස්සු ජන්දය ලබා දී නොමැති බව ආණ්ඩුව ඉක්මණින් තේරුම් ගත යුතුය. මාධ්‍යට චෝදනා කිරීමට ඉඩ ලබා නොදිය යුත්තේ තර්ජනයෙන් නොව ක්‍රියාවෙන් බව අවබෝධ කරගත යුතුය. 76 වසරක් පුරා විනාස වූ රටක් අවුරුදු පහකින් ගොඩ ගැනීමට පහසු නැති බව තේරුම් නොගැනීමට මාධවලා මෝඩ නැත. ඒත් බලය ලැබුනු පසු අන්ධ වූවන් සේ නොහැසිරී මේ රට නිසි මාර්ගයට ගෙන ගමන යාමට ආණ්ඩුවට හැකියාව තිබිය යුතුය.

එච්චරය.